EN
  • تاريخ النشر: 22 ديسمبر, 2009

كرة القدم عموما ليست من هواياتها دوللي شاهين لصدى: أشجع البرازيل ومعجبة بحسن شحاتة

فتحت الفنانة اللبنانية-المصرية دوللي شاهين قلبها لمشاهدي برنامج صدى الملاعب، وتحدثت عن أهمية الرياضة في حياتها، كما كشفت عن تشجيعها للسامبا البرازيلية، ولكنها أكدت أن كرة القدم بشكل عام ليست من ضمن هواياتها.

فتحت الفنانة اللبنانية-المصرية دوللي شاهين قلبها لمشاهدي برنامج صدى الملاعب، وتحدثت عن أهمية الرياضة في حياتها، كما كشفت عن تشجيعها للسامبا البرازيلية، ولكنها أكدت أن كرة القدم بشكل عام ليست من ضمن هواياتها.

سماح عمار، مراسلة البرنامج، التقتها في القاهرة، وكان هذا الحوار:

سماح عمار: الجميلة دوللي شاهين قوليلي الرياضة إيه في حياتك؟

دوللي شاهين: الرياضة مهمة طبعاً للياقة البدنية، بعمل رياضة تقريباً كل يوم، بمشي، بعمل معدة..

سماح عمار: كلنا بنحاول نعمل رياضة عمرنا ما وصلنا للقوام الرشيق دة، بسم الله ما شاء الله

دوللي شاهين: ربنا يخليكي متشكرة أوي.

سماح عمار: متأكدة إن كل دة رياضة ولا أكل ولا إيه؟

دوللي شاهين: لأ بصي هو أصلاً يعني دة ماما كدة وإخواتي كدة يعني دي حاجة déjà موجودة والحمد لله، طبعاً بحافظ عليها أوي، مش بحافظ عليها بحاول إن أنا أحافظ، يعني بردو البني آدم بيكبر، يعني احنا مش حنفضل صغيرين طول العمر، فبردو الرياضة مع العمر بتساعد إنه يفضل الجسم كويس يعني.

سماح عمار: قوليلي إيه اللي ممكن تسمعيه عن كرة القدم؟

دوللي شاهين: إيه اللي ممكن أسمعه؟ لأ بسمع، بسمع كل حاجة، ما بتابعش ماتشات أوي ومفهمش أوي في الكورة، إنما بحب طبعاً أنا بشجع البرازيل جداً، فريقي المفضل وبتفرج على آخر ماتش في المونديال لما تكون البرازيل بتلعب مع حد، بحاول إن أنا لو في ماتش مهم مثلاً في مصر بحاول أتفرج.

سماح عمار: طيب المنتخب المصري، المنتخب السعودي، بتابعي الناس دي؟

دوللي شاهين: قليل، بس آه بحاول أتابع، يعني مثلاً لما مصر كانت بتلعب عشان تتأهل للمونديال طبعاً اتفرجت ع الماتش، يعني لما بيبقى في حاجة كدة، مهمة فهماني، إنما الكأس الأفريقي وكأس مش عارفة إيه لا لا، ما بتابعش، مش أوي.

سماح عمار: انتي قوية أوي، أول ما اتكلمتي اتكلمتي في منتخب البرازيل يعني دة حاجة جامدة جداً..

دوللي شاهين: جايبة م الآخر خلاص، يعني م الآخر مش عايزين نتكلم..

سماح عمار: يعني ثقافتك معدية إنه الكورة دي مجرد إنها حاجة مدورة، انتي معدية، دة كويس أوي

دوللي شاهين: شفتي، طيب والله انتي بتقدري الحاجات دي كويس، دة في ناس غيرك ما بتقدرش المجهود اللي أنا بعمله في موضوع الكورة دة.

سماح عمار: لكن قوليلي إيه رأيك في المنتخب المصري؟

دوللي شاهين: والله كويس جداً وعلى فكرة بردو بعرف أسماء لعيبة، بعرف مثلاً بركات وعماد متعب وحسام إيه، ابتدينا اللخبطة، وميدو، مش بيلعب في الزمالك؟ أعرف ميدو، ومين كمان، يعني أعرف أبو تريكة طبعاً، والحضري، خلاص بقى، وحسن شحاتة المدرب، معجبة بيه بصراحة، بحبه.

سماح عمار: ما جربتيش مرة مع أصحابك تلعبي كرة قدم؟

دوللي شاهين: لا لا لا لا وأنا مالي، يعني ليه ألعب كورة قدم ليه، لا أنا بغني وأمثل والحمد لله وعندي هوايات تانية، إنما الكورة مش من هواياتي بصراحة.