EN
  • تاريخ النشر: 28 ديسمبر, 2009

أثنى على زملائه في العالمي حسام غالي لصدى: لم أكن واثقا من إمكانية عودتي للفراعنة

غالي وحديث الصراحة لصدى

غالي وحديث الصراحة لصدى

أرجع حسام غالي لاعب النصر السعودي ومنتخب مصر سبب غيابه عن منتخب بلاده في الفترة الماضية إلى الظروف المعاكسة التي مر بها في مشواره الاحترافي، معبرا عن امتنانه بتجربته في العالمي، ومقدما شكره لزملائه في الفريق، على مساعدته في تقديم مستوى متميز نجح

أرجع حسام غالي لاعب النصر السعودي ومنتخب مصر سبب غيابه عن منتخب بلاده في الفترة الماضية إلى الظروف المعاكسة التي مر بها في مشواره الاحترافي، معبرا عن امتنانه بتجربته في العالمي، ومقدما شكره لزملائه في الفريق، على مساعدته في تقديم مستوى متميز نجح من خلاله في استعادة مكانه في قائمة الفراعنة.

وفي حوار مطول مع برنامج "صدى الملاعب" تحدث غالي عن الظروف الصعبة التي مر بها، وعن طموحاته في الفترة المقبلة مع النصر والمنتخب المصري، فماذا قال؟

حسام غالي: أولا أنا عايز أشكرك ع الاحتفال الجميل ده.. والمقابلة المشرفة دي، وزي ما انت قلت طبعا شرف كبير لأي لعيب إنه يلبس فانلة بلده مهما كان هو محترف، فالحمد لله بعد غياب سنة ونص تقريبا رجعت تاني وإن شاء الله الجاي يكون أحسن.

ماجد التويجري: أي واحد بيسمعك تقول الحمد لله بعد سنة ونص رجعت تاني حيقول طيب غبت ليه يا حسام؟

حسام غالي: ممكن الظروف اللي أنا مريت بيها في الفترة اللي فاتت دي، من خلافات في توتنهام، مشاكل وابتعادي فترة عن اللعب، في النصر السنة اللي فاتت بردو ما ظهرتش بالمستوى اللي كان ممكن يأهلني إني ألعب مع منتخب مصر، فبعدت شوية والسنة دي الحمد لله بقدم مستوى كويس بشهادة الجميع يعني، ممكن كابتن حسن محتاج مجموعة معينة في الفترة اللي هو كان فيها، تصفيات كأس العالم، كان هما في مجموعة معينة دايماً موجودة بتروح، كان في انسجام بينهم وهما لعبوا مع بعض الفترة اللي فاتت، فهو كان تقريباً باصص إن هو يكمل مع المجموعة دي عشان يعدي تصفيات كأس العالم.

ماجد التويجري: ممكن يكون النصر بوضعه الحالي، ابتعاده عن المنافسة على البطولات شوية وكدة، كنت متصور إنه ممكن يكون جسر العبور مباشرةً لعودتك للمنتخب الوطني المصري؟

حسام غالي: طبعاً يعني كل واحد بيبقى بيخش تجربة جديدة بيبقى تحدي بينه وبين نفسه، أنا ما بروح في أي حتة، حتى لو لعبت في جزر القمر، أكيد بيبقى نفسي ألعب في منتخب بلدي، فكان دايماً الحتة دي جوايا، بشتغل وبجتهد عشان أوصلها يعني، والحمد لله السنة دي النصر بيقدم شكل كويس يعني، كورة كويسة، بيقدم ماتشات كويسة، في مجموعة لعيبة بردو حواليك تساعدك إن هي ممكن تبرزك توديك الحتة اللي انت عايزها، والحمد لله دة اتحقق يعني.

ماجد التويجري: مين اللي رجع حسام للمنتخب؟

حسام غالي: هي بتبقى كله، كله حلقة متصلة ببعضيها، يعني حسام غالي ما يقدرش يلعب كويس أو يظهر كويس لوحده في لعبة جماعية من ضمن 11 لعيب في الملعب، لو هما وحشين بالتالي أنا حبقى وحش، لكن لو المجموعة كلها كويسة بتبرز اللعيب، خاصةً لو الواحد لعيب في نص الملعب، بيعتمد دايماً على اللي حواليه، لو اللي حواليا كويس وفي تحركات إيجابية كويسة وفي مساعدة من اللي حواليا، اللي في نص الملعب دة حيظهر يعني.

ماجد التويجري: كان عندك ثقة إنه حترجع؟ -- حسام غالي: شوية يعني مش مية في المية.

ماجد التويجري: متى تأكدت؟

حسام غالي: يعني كنت عارف إني حرجع ومش حرجع، معرفش، يعني غياب بردو كتير عن المنتخب خلا الواحد بردو ثقته بنفسه مش تمام يعني.

ماجد التويجري: يعني ثقتك بنفسك مهزوزة؟

حسام غالي: لرجوعي المنتخب مش ثقتي بنفسي كلعيب كويس أو لا، رجوعي للمنتخب كانت مهزوزة شوية.